ស្របពេលគ្រប់បណ្ដាប្រទេស ក្នុងអាស៊ាន បានចាំផ្ដើមផ្ដោតចំណាប់អារម្មណ៍លើការប្រែក្លាយទីផ្សារយានយន្ដ របស់ខ្លួនជា ទីផ្សាររថយន្ដអគ្គិសនី តាមរយៈការដាក់យុទ្ធសាស្រ្ដបន្ថយពន្ធនាំចូល ផ្ដល់ប្រាក់ឧបត្ថម្ភ ផ្សព្វផ្សាយ ពីបញ្ហាបំពុលបរិយាកាស និងឲ្យប្រជាពលរដ្ឋប្រើប្រាស់ឡានអគ្គិសនីឲ្យបានច្រើនជាដើម ក្នុងនោះ ប្រទេស(ក្នុងអាស៊ាន) ដែលហាក់សកម្មជាងគេក្នុងវិស័យនេះ មានដូចជា ថៃ វៀតណាម ឥណ្ឌូនេស៊ី ខណៈដែលថ្មីៗនេះ ហ្វីលីពីន ប្រកាសប្រឡូកចូល ក្នុងទីផ្សារឡានអគ្គិសនីដែរ ដោយចេញយុទ្ធសាស្រ្ដលុបបំបាត់ពន្ធនាំចូលឡានអគ្គិសនីតែម្ដង។ 

តាមការចុះផ្សាយពីសារព័ត៌មាន Ruetre បានឲ្យដឹងថា លោក Ferdinand (BongBong) Marcos Jr ប្រធានាធិបតី បច្ចុប្បន្នរបស់ប្រទេស ហ្វីលីពីន នឹងចេញសេចក្ដីអនុញ្ញាត ឲ្យបញ្ចុះពន្ធនាំចូលយានយន្ដអគ្គិសនី គ្រប់ប្រភេទ មិនថា ឡាន គ្រួសារខ្នាតតូច, ឡានអ្នកដំណើរធុនតូចធំ, ឡាន pick up, ឡានដឹកទំនិញ, ម៉ូតូ, ឬ កង់​ ព្រមទាំងគ្រឿងបន្លាស់ និងគ្រឿងបង្គុំ របស់វា ពីគ្រប់ប្រទេស (Most-favoured nation Tariff / MFN Tariff) មកនៅ ០% សម្រាប់រយៈពេល ៥ ឆ្នាំ ដែលបច្ចុប្បន្នកំពុងគិតពី ៥% ទៅ ៣០%។ 

បើតាមសម្ដីរបស់លោក Arsenio Balisacan អគ្គលេខាធិការ នាយកដ្ឋានផែនការសេដ្ឋកិច្ច របស់ប្រទេស ហ្វីលីពីន បានមានប្រសាសន៍ថា ៖ 

គម្រោងកិច្ចប្រតិបត្តិការនេះ គឺធ្វើឡើងក្នុងគោលបំណងពង្រីកទីផ្សារយានយន្ដអគ្គិសនី និងជំរុញឲ្យប្រជាពលរដ្ឋ ប្រើប្រាស់យានយន្ដអគ្គិសនីឲ្យបានគ្រប់ៗគ្នា ដើម្បីកាត់បន្ថយការប្រើប្រាស់ និងនាំចូលប្រេងឥន្ទនៈពីក្រៅប្រទេស ស្របពេលតម្លៃប្រេងកំពុងកើនឡើង ព្រមទាំងដើម្បីលើកកម្ពស់ ឧស្សាហកម្មអគ្គិសនីអេកូឡូស៊ី ក្នុងប្រទេសផងដែរ។  

គួរបញ្ជាក់ផងដែរ ប្រតិបត្តិការនេះ នឹងអនុវត្តសម្រាប់តែចំពោះយានយន្ដអគ្គិសនីប៉ុណ្ណោះ ចំណែកឯរថយន្ដ Hybrid គឺ នឹងត្រូវគិតពន្ធនាំចូល និងអនុត្តលក្ខខណ្ឌផ្សេងៗ ជាធម្មតា។ ក្នុងនោះដែរ យុទ្ធសាស្រ្ដនេះ អាចនឹងមានប្រសិទ្ធភាព ឬ យ៉ាងណា ក៏ស្ថិតលើស្ថានភាពជាក់ស្ដែង ដោយហេតុថា បច្ចុប្បន្នតម្លៃរថយន្ដអគ្គិសនីនាំចូលក្នុងប្រទេស ហ្វីលីពីន ជាមធ្យមពី ២១០០០ ដុល្លារ ទៅ ៤៩០០០ ដុល្លារ ធៀបទៅនឹងរថយន្ដធម្មតា ខ្ទង់ពី ១៩០០០ ទៅ ២៦០០០ ដុល្លារ លើសពីនេះ ប្រទេសក្នុង តំបន់អាស៊ីអាគ្នេយ៍ ភាគច្រើនពឹងផ្អែកលើការប្រើប្រាស់ និងនាំចូលប្រេងឥន្ធនៈពីក្រៅប្រទេសច្រើន។ អត្ថបទ៖ Andra